TVB「處境劇女王」親揭與郭少芸不和10年內幕：唔睬我咪唔打招呼

現年65歲的林漪娸1980年參選港姐入行，拍過《真情》、《皆大歡喜》、《誰家灶頭無煙火》以及《愛·回家》系列等多部處境劇，被稱為「處境劇女王」，她又因出眾氣質專演有錢人，獲封TVB「御用貴婦」。圈内出名好人缘的林漪娸最近作客鍾慧冰（冰姐）的YouTube頻道《冰姐的花樣人生》，激罕談及與郭少芸不和內幕。

林漪娸曾與郭少芸一同拍攝第一輯《愛‧回家》，談到與對方關係，林漪娸直認「冇太多兩句」：「我都唔知點解㗎，其實之前都同佢好好傾，咁開始佢唔係好睬我，咁就算啦，唔睬咪唔打招呼，唔係話你對我唔好，我對你唔好嘅。（咁有冇問佢點解？）咁又冇喎，隨緣囉，可能而家見返又冇嘢㗎，其實都冇嘢㗎，係少傾咗偈。」翻查資料，二人於2005年傳出不和，當時林漪娸被指因拍戲「交行貨」等等而傳被杯葛，之後林漪娸亦曾承認二人於化妝間互不瞅睬。