現年56歲的錢嘉樂是香港著名武指兼動作演員，曾與不少女神拍拖，包括李麗珍、關秀媚，而與李珊珊一段情最為人所知，有指錢嘉樂多次在朋友起鬨下向李珊珊求婚，最後「婚」訊變「分」訊，8年情盡。李珊珊早前接受陳志雲訪問稱「對方係被逼情況下跪低去做呢件事，唔係真係求婚」，並斷言：「從來冇諗過未來，個天安排，要完就完」。
回復單身後，錢嘉樂與湯盈盈因拍攝《獎門人》而撻著，2012年在熊貓「盈盈」和「樂樂」見證下簽紙結婚，婚後育有大女錢凱晴（Alyssa）和細女錢凱琪（Kassidy），一家四口生活美滿。日前錢嘉樂接受鄭丹瑞的YouTube頻道《健康旦 HiEggo》的訪問，冧爆表示是湯盈盈改變了自己。
受湯盈盈感染更懂得表達愛
節目上，錢嘉樂被問到為何愛湯盈盈，他覺得是「緣份」，雖然一開始對湯盈盈印象不深，只知對方由外國回流，後來發現湯盈盈思想傳統，對父母特別有孝心。錢嘉樂說：「 因為佢爸爸媽媽喺加拿大，佢每日都會打長途電話畀佢哋，佢都叫我要搵多啲爸爸媽媽，我唔係唔錫佢哋，不過男仔同女仔嘅態度唔同，我唔會日日打電話畀佢哋噓寒問暖，但原來有啲嘢要講出嚟，唔講人哋又點會知，所以我會更珍惜同屋企人來往。」
湯盈盈煮飯煲湯鎖住男人個胃
錢嘉樂大爆太太馭夫秘訣，原來湯盈盈煮飯煲湯都好叻，懂得鎖住男人的胃。他笑說：「唔知係咪佢阿媽教佢，鎖住男人一定要鎖住胃，佢會煮飯煲湯，佢喺外國返嚟以為係ABC，點知識煮飯煲湯又會噓寒問暖，會影響埋身邊嘅另一半。嗰陣時我哋未結婚，但係會主動勸我打個電話問候吓媽媽，我覺得呢個女仔幾好。」
不會教女兒學功夫給予發空間
湯盈盈成功收復浪子，令錢嘉樂性格轉變，婚後成為愛妻號及暖男爸爸。錢嘉樂揚言會給最好的兩女兒，對於她們的將來，亦會視乎她們的興趣給予空間發展。錢嘉樂說：「我唔一定要佢哋入呢一行，我唔會教佢哋打功夫，我哋幾十年都咁辛苦。但如果佢哋有興趣，我都唔會阻止，盡量畀最好嘅嘢，好靠佢哋自己。 我阿媽當年都係咁樣做，我成日同老竇講話多謝你，雖然你冇李嘉誠畀咁多錢我，你畀咗我非常好嘅身體，等我喺洪家班可以捱得到，你嘅腦想捱但身體捱唔到都要棄權。」
Comments