每年港姐都有不少從國外回流或從內地來港參賽的佳麗，未必識講廣東話，都是入圍後一邊選美一邊學，亦有人因口音鬧出不少笑話。今年13號佳麗袁文靜有「小李亞男」稱號，她在上海成長的她來了香港僅四個月，她本身並不懂得廣東話，參賽期間靠睇《愛．回家之開心速遞》苦練，進步神速，日前更在「2025港姐特訓班」才藝表演環節向高難度挑戰，有別於其他人演戲或行Catwalk，她選擇表演「廣東話Rap」！
Rap詞非常高難度，就算土生土長香港人都可能會㪐㩿（音：甩咳），尤其「雞屎」同「街市」就很容易搞錯發音，袁文靜Rap出以下內容：
今日禮拜，我想行花街，心情幾咁high，我着對靚波鞋。
因為行得快，唔記得綁鞋帶，跣親都唔怪，我有個好心態。
喺呢個街市，有雞屎藤茶果，唔使用筷子，都幾時翻尋味㗎啵。
佢叫雞屎藤，唔係街市藤，清甜又止咳，客家人嘅魂。
喺呢個街市，飲返個hightea，喺呢個街市，真係冇雞屎。
能記晒整段繑口Rap詞實在值得一讚，不過其「譚仔口音」不睇字幕基本上是聽不明白，難怪陳法蓉、謝寧、朱凱婷等都聽到一頭霧水，麥美恩更一臉茫然皺晒眉，聽到趴喺度笑，袁文靜自言：「我覺得呢個Rap本身就係用嚟搞笑嘅，而家達到呢個效果。」而這段聽落似數白欖的Rap，就成功突圍獲得4000幾Likes，並引起網民熱議。
雖然都有網民批評唔識講廣東話、非香港文化下成長的佳麗，難以成為代表香港的「香港小姐」，但也有不少人欣賞她願意由零開始學廣東話，認為至少有誠意，網民留言：「你本身廣東話唔好，但係你都咁勇敢去嘗試玩Rap，真係好好笑，聽得我好過癮，你加油，繼續創新」、「試吓啦，香港幾好玩。」
Comments