港姐2025｜佳麗李尹嫣唔擔心有黑材料：我對自己過去有信心

全城矚目選美盛事《2025 香港小姐競選》今日（31/7）於電視城舉行候選佳麗外景出發拜神。 1號李尹嫣（Victoria）接受《香港01》訪問時表示：「我好期待，因為我喺英國讀書嘅時候都識到馬來西亞嘅朋友，而佢哋都有同我講檳城有好多美食，同埋有佢哋嘅獨特文化，變咗我係好期待今次嘅行程。」

問到裝備清單？Victoria笑言用盡行李箱乘機重量，攜帶了很多護膚產品：「我諗我係咁多人之中係帶咗最多嘢嘅一個，我帶咗好多面膜同護膚品，同埋我帶咗1公升嘅防曬乳液，因為諗住每個佳麗都可以一齊用，同埋帶咗啲瘦腿襪，希望可以消到水腫，因為平時我個人容易水腫。（怕唔怕被爆黑材料？）我對自己過去有信心，相信冇太大嘅嘢可以被爆到嘅，如果講返我以前嘅嘢，我係行得正企得正。（有冇夜蒲？）我諗18歲，每個人都有同朋友出過去，飲吓酒傾吓偈，但去蒲就真係冇。（怕唔怕被朋友出賣？）唔驚，因為我合法年齡做緊合法嘅嘢，同埋我冇做一啲違反道德嘅嘢，咁所以我係OK嘅冇問題嘅。」